२९ चैत्र, सप्तरी। सप्तरीको हरिहरपुर गाबिसमा शनिबार दिउँसो आगलागी हुँदा आठ परिवारको १७ घर पुर्ण रुपले जलेर नष्ट भएको छ । स्थानीय बिन्देश्वर चौधरीको गहुँ दाउनी गर्ने क्रममा थे्रसरबाट सल्केको आगोले चौपाया, अन्नपात, नगद र अन्य सामाग्री गरी कुल ४९ लाख ३५ हजार बराबरको धनमाल जलेर नष्ट भएको हो । दिउसो २ बजे लागेको आगोले बिन्देश्वर चौधरीको ५ घर, ३ वटा भैसी, २ वटा गाई, २ वटा गोरु र २ वटा खसी, बच्चा मालीको ३ वटा घर, नगद १ लाख, २ तोला सुन, पुर्ब विधायक असर्फी सदाको २ वटा घर, बिष्णुदेव चौधरीको ३ घर, भोला चौधरीको १ घर, झल्टी चौधरीको १ घर, शशी चौधरीको १ घर र बुदुर सदाको १ घर पुर्ण रुपले जलेर नष्ट भएको प्रहरीले जनाएको छ । राजबिराज र लहान नगरपालिकाबाट गएको बारुण यन्त्र, जिल्ला प्रहरी कार्यालय सप्तरी, प्रहरी चौकी पकरीका प्रहरी, सशस्त्र प्रहरी बेस क्याम्प सीतापुरका सशस्त्र प्रहरी र स्थानीय बासीको प्रयासमा बेलुकी ५ बजेतिर आगो नियन्त्रणमा लिईएको छ । आगलागीमा ४९ लाख ३५ हजार बराबरको धनमाल जलेर नष्ट भएको प्रहरीको प्राम्भिक अनुमान छ । आगो नियन्त्रणमा लिने क्रममा बिन्देश्वर चौधरी र उनको २५ बर्षीय छोरा सुशिल चौधरी जलेर घाईते भएको प्रहरी चौकी पकरीका ईन्चार्ज प्रहरी सहायक निरीक्षक रामकिशोर स्वर्णकारले जानकारी दिए ।
