traffic-rule-violetion

१८ वैशाख। ट्राफिक नियमविपरित सवारी चलाउने र ट्राफिक नियम उल्लंघन गर्नेसंगबाट असुल गरिने जरिवानाको रकम करिब २० गुणाले बढेको छ। न्युन जरिवाना कायम हुँदा ट्राफिक नियमविपरित सवारी चलाउनेको संख्या बढेको र दुर्घटनाको संख्या पनि बढेको कारण देखाउदै नेपाल सरकारले जरिवाना रकम बढाएको जनाएको छ।  यातायात व्यवस्था ऐन ०४९ को दफा १६४ मा रहेको जरिवानाको व्यवस्थालाई संसोधन गर्दै जरिवाना बापतको रकमलाई बढाइएको महानगरिय ट्राफिक प्रहरी महाशाखाले जनाएको छ।

महानगरिय ट्राफिक प्रहरी महाशाखाले दिएको जानकारी अनुसार जरिवानाबापत बढाइएको रकम आइतबारबाट देशभर लागू हुने छ। महाशाखाका अनुसार विगतमा कारवाहीबापत असुल गरिने २५ रुपैयाँ जरिवानालाई बढाएर ५०० पुर्याइएको छ भने नियमविपरित सवारी चलाउनेलाई १५ सय रुपैयाँसम्मको चिट काट्न सक्ने गरी जरिवानाको रकम बढाइएको छ। मापसेमा सबैभन्दा बढी एक हजार रुपैयाँ मात्र जरिवाना हुने व्यवस्था थियो। नयाँ व्यवस्था अनुसार नियम मिच्ने चालकलाई २५ रुपैयाँबाट बढाएर अब न्यूनतम ५ सय रुपैयाँ जरिवाना हुनेछ।

सरकारले ऐनमा भएको २५ रुपैयाँ देखी ५० रुपैयाँसम्म, ५० देखी एक सय रुपैयाँसम्म र एक सय देखी २ सय रुपैयाँसम्मको कारवाहीको रकमलाई संसोधन गर्दै क्रमश ५ सय, एक हजार र १५ सय बनाएको हो। महाशाखाका अनुसार न्यूनतम ५ सय रुपैयाँ जरिवाना पाएको चालकले गल्ति दोहोर्याएमा जरिवाना रकम बढ्दै जाने छ। पहिलो पटक कारबाहीमा पर्नेले ५ सय, दोस्रो पटक परेमा एक हजार र तेस्रो पटक परेमा १५ सय जरिवाना हुने महाशाखाले जनाएको छ। नियम अनुसार ५ पटकसम्म कारवाहीमा परेको चालकलो लाइसेन्स ६ महिनाका लागि खारेज हुने छ ।

कुन नियम मिच्दा कति कारबाही ?

५०० जरिवाना हुने कसुरहरु

१. तोकिएको भन्दा बढि मालसामान राखेमा

२. सवारीको वजन हद निर्धारण क्षेत्रमा बढि वजनको सवारी चलाएको

३. सवारीको अन्य भागमा मानिस तथा मालसामान राखेको

४. प्रयोजन बिपरीत सवारी चलाएको

५. हेल्मेट नलगाएको

६. सवारी आवागमनमा बाधा पुरयाएको

७. अरु सवारीलाई खतरा हुने किसिमले सवारी राखेको

८. छतमा यात्रु बोकेको वा राखेको

१००० जरिवाना हुने कसुरहरु

१. सवारी चालक अनुमति पत्र प्राप्त नगरी सवारी चलाएको

२. सार्वजानिक स्थानमा बाधा पुग्ने गरी मालसामान वा सवारी राखेमा

३. दुर्घटनामा परेको सवारी तथा यात्रीको हानी नोक्सानी पुयाएको वा सम्पर्कमा नआएको

४. मादक पदार्थ सेवन गरी सवारी चलाएको

५. सवारी चालक अनुमति पत्र प्राप्त नगरेको व्यक्तिलाई सवारी चलाउन दिएमा

१५०० सम्म जरिवाना हुने कसुरहरु

१. ट्राफिक संकेत वा ईसारा उल्लंघन गरी सवारी चलाएको

२. सवारी अड्याउन निषेध गरिएको ठाउँ वा समयमा सवारी अड्याएको

३. सवारी मोड्न वा ध्वनि संकेत दिन निषेध गरिएको ठाउँमा सवारी मोडेको वा ध्वनि दिएको

४. सडकमा गलत साईड तर्फबाट सवारी चलाएको

५. एकतर्फि सडकमा सो विपरित सवारी चलाएको ।

६. अवस्था ठिक नभएको सवारी चलाएको ।

७. निर्धा्रित गतिभन्दा बढी गतिमा सवारी चलाएको ।

८. राती बत्ती नबाली सवारी चलाएको ।

९. सवारी चलाउन निषेध गरिएको ठाउँ वा समयमा सवारी चलाएको ।

१०. नम्बर प्लेट नराखी सवारी चलाएको ।

११. सवारीको वजनको हद निर्धारण गरिएको ठाउँमा वजन भन्दा बढी वजनको सवारी चलाएको ।

१२. पेटी नबाँधी वा हेलमेट नलगाई सवारी चलाएको ।

१३. सवारीमा बस्ने वा राख्ने मानिस वा मालसामानको हद निर्धा्रित गरिएकोमा सो हद भन्दा बढी राखी सवारी चलाएको ।

१४. सार्वजनिक सवारीको चालकले यात्री लिन ईन्कार गरेको ।

१५. निर्धारित भाडा दर भन्दा बढी भाडा लिई सवारी चलाएको ।

१६. लापरवाहीका साथ सवारी चलाएको ।

१७. बाटो ईजाजत पत्र नलिई सार्वजनिक सवारी चलाएको ।

१८. सवारी चालक अनुमती पत्र, सवारी दर्ता किताब, सवारी इजाजत पत्र साथमा नराखी सवारी चलाएको । विजपाटी बाट ।

 

तपाईको प्रतिक्रिया