काठमाडौं – नेपालले एएफसी यु–१६ च्याम्पियनसिपको छनोटमा उमेरभन्दा बढीका खेलाडी खेलाएको पुष्टि भएको छ । एएफसीले उमेरभन्दा बढीका खेलाडी खेलाउने नेपाली टोलीलाई प्रतियोगिता खेल्नबाट वञ्चित गर्दै अखिल नेपाल फुटबल संघलाई समेत आर्थिक जरिवानासहितको जानकारी पत्र पठाएको छ । भर्खरै मात्रै नेपालले छनोट प्रतियोगितामा सबै समूहका उपविजेतामध्येबाट उत्कृष्ट भएर भारतमा हुने प्रतियोगिताका लागि स्थान बनाएको थियो । तर प्रतियोगितामा उमेरभन्दा बढीका खेलाडी खेलाएको पुष्टि भएपछि नेपालले अब आगामी वर्ष भारतमा हुने प्रतियोगिता खेल्न पाउनेछैन । एमआरआई टेस्टका लागि छानिएका नेपालका आठ खेलाडीमध्ये परिक्षणमा क्रममा एक खेलाडीको उमेर १६ वर्षभन्दा माथि रहेको पाइएको हो । यसअघि गत महिना किर्गिजस्तानमा भएको खेलमा नेपालले आयोजक किर्गिजस्तान र जोर्डनलाई हराएको थियो । उमेरभन्दा बढीका खेलाडी खेलाएको पुष्टि भएपछि एएफसीले नेपाललाई १४ हजार ५ सय अमेरिकी डलरको जरिवाना समेत गर्ने भएको छ । नेपालले गत संस्करणमा पनि यही प्रतियोगितामा उमेरभन्दा बढीका खेलाडी खेलाएको थियो । तर गत संस्करणमा छनोट भएर प्रतियोगिता खेलिसकेपछि मात्रै नेपालले उमेरभन्दा बढीका खेलाडी खेलाएको पुष्टि भयो । फलस्वरुप एएफसीले नेपाललाई कारबाही गर्दै नेपालले खेलेको उज्वेकिस्तान विरुद्ध बराबरी खेलमा नतिजा उल्ट्याएर नेपाल पराजित भएको घोषणा गरेको थियो । त्यस्तै कुवेत विरुद्ध नेपालले हासिल गरेको जीतमा पनि नतिजा उल्ट्याउँदै नेपाल पराजित भएको घोषणा गरिएको थियो । गत संस्करणमा पनि नेपालमाथि एएफसीले आर्थिक जरिवाना गरेको थियो ।रातोपाटिबाट
