नयाँदिल्ली। नेपाल र भारत प्रबेद्ध समूहको मंगलबार सुरु बैठकमा नेपालले औपचारिक रुपमा सन् १९५० को शान्ति तथा मैत्री सन्धि संशोधनको प्रस्ताव गरेको छ । त्यसैगरी दुई देशको व्यापार तथा पारवहानको विषयले पनि बैठकमा प्राथमिकता पाएको छ ।

प्रबुद्ध समूहको नयाँदिल्लीस्थित सचिवालयमा सुरु बैठकमा नेपाली प्रबुद्ध समूहका संयोजक भेखबहादुर थापाले पहिलो सत्रमै सन्धि संशोधनको प्रस्ताव राखेका हुन् ।

‘हामीले सन् १९५० को शान्ति तथा मैत्री सन्धि संशोधनको प्रस्ताव ग¥यौं,’ संयोजक थापाले भने, ‘अब यसबारे दुवै पक्षबीच छलफल सुरु भयो ।’

नेपाली पक्षको मागअनुसार १९५० को सन्धि संशोधनको विषय प्रबुद्ध समूहको पहिलो एजेन्डा भएको छ । नेपाल र भारतबीच भएका सन्धि–सम्झौता पुनरावलोकनको सिफारिस गर्न प्रबुद्ध समूह गठन गरिएको हो । समूहको सिफारिसका आधारमा दुई मुलुकबीच वार्ता हुनेछ ।

१९५० को सन्धिमा उल्लेख गरिएका प्रावधानहरुमध्ये नेपालले तेस्रो मुलुकबाट सैन्य सामग्री आयात गर्दा भारतीय पक्षको अनुमति लिनुपर्ने, प्राकृतिक स्रोत साधनमा भारतलाई पहिलो प्राथमिकता दिनुपर्नेलगायत विषयमा संशोधन गर्नुपने प्रस्ताव राखेको स्रोतले बतायो ।

दुवै देशका नागरिकलाई सम्पत्ति किनबेचमा बराबर हैसियतमा राख्ने प्रावधान पनि नेपालले हटाउन खोजेको छ । भियनालगायत अन्य सन्धि–सम्झौता भएपछि सन्१९५० को सन्धिका केही प्रावधान प्रभावकारी नभएकाले त्यसलाई हटाउनुपर्ने प्रस्ताव नेपाली पक्षले गरेको आजको कान्तिपुर दैनिकमा खबर छ ।

तपाईको प्रतिक्रिया