०७ चैत, दिलिप साह राजविराज। सीमांकनलाई थाती राखेर सरकारसँग कुनै सम्झौता नगर्ने तराई मधेस लोकतान्त्रिक पार्टीका अध्यक्ष महन्थ ठाकुरले बताएका छन् । बाहिर चर्चा भए जस्तो कुनै सहमति नभएको भन्दै उहाले संविधान संशोधन नभई मधेसी मोर्चा चुनावमा नजाने बताउनुभयो ।

गत फागुन २३ गते सप्तरीको मलेठमा प्रहरीको गोलीबाट मारिएका पाँच जनाको परिवारलाई भेट्न सप्तरी आएका ठाकुरले सीमांकन हेरफेरसहित संसदमा पेश भएको संशोधन विधेयक परिमार्जनसहित पास नभए मोर्चा निर्वाचनमा जान नसक्ने बताउनुभयो । सरकार र मोर्चाबीच सहमति भएको कुराहरु बाहिर आएका सन्दर्भमा मधेसी मोर्चाका नेता ठाकुरले भन्नुभयो– ‘अहिलेसम्म यस्तो कुनै सहमति भएको छैन र, यस्तो सहमति हामीले गर्न पनि सक्दैनौं ।

जनआन्दोलन, मधेस आन्दोलनको मर्मलाई बुझ्दै आन्दोलनबाट आएका उपलब्धीहरुलाई संस्थागत गर्न संविधान संशोधन गर्नैपर्ने उहाको कथन रहेको छ। प्रजातान्त्रिक मुलुकहरुमा बन्दुकको काम नभएको बताउँदै शान्तिपूर्ण प्रदर्शन गर्नेमाथि बन्दुक चलाउने मुलुकलाई प्रजातान्त्रिक भन्न नसकिने तमलोपाका अध्यक्ष ठाकुरले बताउनुभयो । ‘नेपालमा प्रजातन्त्रदेखि गणतन्त्र आइसकेको छ भनिन्छ’ तर शान्तिपूर्ण प्रदर्शनमा समेत गोली प्रहार गरी जनता मार्ने देशलाई के भन्ने ?’ ठाकुरले प्रति प्रश्न गर्नुभयो ।

मृतक परिवारलाई भेट्न आएका ठाकुरले पाँचै जनाको घरमा गएर सान्तवना दिँदै मलेठ २ का सञ्जन मेहता, बिरेन्द्र महतो, मलेठ ४ का पिताम्बर मण्डल, जमुनी मधेपुरा गाविसका इनरदेव यादव र प्रसवनी गाविसका आनन्द साहको घरमा पुगेर ठाकुरसहित उहाका पार्टी नेताहरुले सान्वतना दिएका छन् ।ठाकुरले पाँचै जनाको परिवारलाई रु २५ हजारका दरले नगद सहयोग समेत गरेको तमलोपाका जिल्ला अध्यक्ष रामप्रित यादवले जानकारी दिनुभयो ।

तपाईको प्रतिक्रिया