काठमाण्डाै । श्रम तथा रोजगारमन्त्री फरमुल्लाह मन्सुरले कतारको कूटनीतिक समस्याले त्यहाँ कार्यरत कामदारलाई तत्काल कुनै असर नगर्ने बताएका छन्। बिहीबार उनले भने, ‘श्रम तथा रोजगार मन्त्रालय र परराष्ट्र मन्त्रालयबीच हरेक दिन कतारको पछिल्लो अवस्थाको अपडेट लिने र अब चाल्नुपर्ने कदमका विषयमा छलफल जारी छ। त्यहाँको अवस्था सामान्य छ, तत्काल कुनै निर्णय दिनुपर्ने अवस्था छैन।’ नेपाल सरकारको सम्पूर्ण ध्यान अहिले कतारमै रहेकोसमेत उनले बताए।

मन्त्री मन्सुरका अनुसार अहिले कतारस्थित नेपाली दूतावास, त्यहाँ कार्यरत श्रमसहचारीलगायत निकायबाट हरेक अवस्थाको अपडेट लिने काम भइरहेको छ। मन्त्रालयमातहतका निकाय र नेपाल सरकारका अन्य सरोकारवाला निकायलाई कतारमा कामदारबारे आउन सक्ने सम्भावित समस्याबारे तयारी अवस्थामा रहन आग्रह गरेको उनले जानकारी दिए।

‘नेपाल सरकारको ध्यान अहिले कतारतर्फ केन्द्रित छ। सम्भावित सबै परिस्थितिको सामना गर्न सबै निकाय तयारी अवस्थामा छन्। तर, हाम्रो आँकलनअनुसार कतार समस्या छिटो र शान्तिपूर्ण रूपमा समाधान हुन्छ। तत्काल कतारबारे कुनै निर्णय लिनुपर्ने अवस्था आइसकेको छैन,’ मन्त्री मन्सुरले भने।

नेपालबाट कतारका लागि श्रम स्वीकृति लिने युवाको क्रम अहिले पनि जारी छ। वैदेशिक रोजगार विभागका निर्देशक मोहन अधिकारीका अनुसार पछिल्लो समय श्रम स्वीकृति लिने युवाको संख्या सामान्य घटे पनि यसको ठोस कारण भने अहिल्यै भन्न सकिने अवस्था छैन। ‘रमजानको वेला अघिल्ला वर्षमा पनि श्रम स्वीकृति घट्ने भएकाले कतारको कूटनीतिक संकटकै असर हो भन्न सकिन्न,’ उनी भन्छन्। श्रम स्वीकृति लिने कति युवा विदेश गए भन्ने तथ्यांक श्रम तथा रोजगार मन्त्रालयमातहतका कुनै निकायसँग छैनन्, जसले गर्दा कतार जाने कामदार घटे या बढे भन्ने यकिन भन्न सकिँदैन।

कतारमा कामदारको माग घटेको छैन : व्यवसायी

नेपाल वैदेशिक रोजगार व्यवसायी संघका अनुसार अहिले पनि कतारमा कामदारको माग घटेको छैन। ‘कतारमा कामदारको माग सामान्य अवस्थाकै बराबरी छ,’ संघका अध्यक्ष विनोदप्रसाद ढकाल भन्छन्, ‘हामी त्यहाँस्थित रोजगारदाता कम्पनीसँग सम्पर्कमा छौँ।’अाजकाे नयाँ पत्रिकामा खबर छ ।

तपाईको प्रतिक्रिया