काठमाडौं, ८ असार । सुनसरीको दक्षिण पश्चिमी कोसी गाउँपालिका, जहाँ निर्णायक मत सीमापारि अर्थात भारतमा छन् । स्थानीयबासीका अनुसार जुन पार्टीले ती मतदातालाई वारि ल्याइ खानपान गराउन सक्छ, त्यही पार्टी विजयी हुनेछ । आजको कान्तिपुरमा खबर छ– प्रमुख दलका उम्मेद्वार जति घरदैलोमा व्यस्त छन्, त्यति नै पारिका भतदातालाई कहिले ल्याएर कहाँ र कस्तो मेजमानको साथ राख्न सकिन्छ भन्ने कसरतमा पनि छन् । कोसी गाउँपालिकामा २२ हजार ४ सय ३० मतदाता छन्, तीमध्ये पारि अर्थात भारतमा झन्डै ३ हजार छन् । उनीहरु धेरैजसोको स्थायी बसोबास भारत नै हो, यहाँ उनीहरुका नातेदार मात्र छन् । भारतमा रहेका थोरै मतदाताको मात्र नेपालमा घरबास या जग्गा छ । तिनको दुवैतिर नागरिकता र मतदाता सूचीमा नाम छ । ‘यता आएर भोट नहाले मतदाता सूचीबाट नाम काटिएला भनेर उनीहरु मत खसाल्न आउँछन्,’ कांग्रेसका गाउँपालिकाका अध्यक्ष उम्मेद्वार अयुव अन्सारीले भने ।

तपाईको प्रतिक्रिया