sushil_thakur1२५ मंसिर काठमाडौँ।मधेसी मोर्चाले एकमुष्ट सहमति हुनुपर्ने अडान लिएपछि आज सरकार र मोर्चाबीच भएको वार्ताले कुनै निर्णय दिन सकेन ।सत्तारुढ प्रमुख दलका नेता र मोर्चाबीचको छलफलमा दुवै पक्षले विषयवस्तु राखेका भए पनि त्यसमा दुवै पक्ष टसको मस भएनन् ।

प्रधानमन्त्री कार्यालय सिंहदरबारमा करिब दुई घन्टा चलेको छलफलमा सरकारले सदनमा प्रस्तुत गरेको भूकम्पपछिको पुनःनिर्माण प्राधिकरण गठनसम्बन्धी विधेयक पारित गर्न मोर्चा सहमत देखिए पनि प्रमुख प्रतिपक्षी दल नेपाली काँग्रेसले आफ्नो सरकारको पालामा सदनमा पेस गरेको संविधान संशोधनसम्बन्धी प्रस्तावलाई सँगै अगाडि बढाउने कुरा राखेकामा मोर्चाले असहमति जनाएको थियो ।

दुवै प्रस्तावलाई अघि बढाउँदा आफ्नो विषय ओझेलमा पर्ने भन्दै मोर्चाले संशोधन प्रस्तावले मधेसीको मागलाई पूरा नगर्ने भएको र अहिले उक्त प्रस्ताव पनि लैजाँदा विषयवस्तु थप जटिल हुने जनाएको छ । सरकारी पक्षले भने मोर्चासँगको वार्तामा अधिकांश कुरा मिलिसकेको जिकिर गरेको छ ।

उपप्रधानमन्त्री विजयकुमार गच्छदारले आजको वार्तामा कुरा मिलिसकेको उल्लेख गर्दै भने “म भन्छु कुरा मिलिसकेको छ, पुनःनिर्माण गठनसम्बन्धी विधेयक पारित गर्ने सन्दर्भमा सत्ता पक्ष, प्रतिपक्ष र मधेसी मोर्चा एकमत भएका छन्, यो सहमतिको सुरुआत हो, अरु विषय पनि मिल्दै जान्छ ।”

कानुन, न्याय तथा संसदीय मामिलामन्त्री अग्निप्रसाद खरेलले आजको वार्तामा प्राधिकरण गठनसम्बन्धी विधेयक पारित गर्न सबै सहमत भएको र अन्य विषय छलफलका आधारमा अघि बढ्ने बताए । “वार्तामा मोर्चाले आफ्नो कुरा राख्यो, प्राधिकरण विधेयक पारित गर्नेमा नेपाली काँग्रेस पनि सहमत छ, उसले संविधान संशोधनको प्रस्तावलाई पनि सँगै अघि बढाऊ भनेको छ, यसमा छलफल गरी सहमति खोज्छौँ, संविधान संशोधनका विषयमा राजनीतिक सहमति गरेर अघि बढिन्छ,”–उनले भने ।

मोर्चाको एक घटक सङ्घीय समाजवादी फोरम नेपालका अध्यक्ष उपेन्द्र यादवले मधेसी, आदिवासी जनजातिलगायतको विषयलाई सम्बोधन गर्न संविधानमा व्यवस्था भएको सीमाङ्कनको परिवर्तनबिना समाधान नहुने आफूहरुको धारणा रहेको तर सत्ता पक्ष र प्रतिपक्ष उक्त विषयमा प्रवेश नै गर्न नचाहेकाले पटक पटकको वार्ता निष्कर्षहीन हुँदै आएको जिकिर गरे ।

मानवीय संवेदनशीलताका आधारमा प्राधिकरणसम्बन्धी विधेयकलाई पारित गर्न सदन खोल्न बिहीबारको वार्तामा सहमत भएको उल्लेख गर्दै उहाँले यसलाई कमजोरीका रुपमा लिई प्रतिपक्षीले संविधान संशोधन प्रस्ताव झुन्ड्याएर विषय अल्झाउने प्रयास गरेको आरोप लगाए ।

वार्तामा प्रधानमन्त्री केपी शर्मा ओली, उप्रधानमन्त्री गच्छदारसहितका सरकारी वार्ता टोली र सत्तारुढ नेकपा (एमाले) का वरिष्ठ नेता झलनाथ खनाल, एकीकृत नेकपा (माओवादी)का उपाध्यक्ष नारायणकाजी श्रेष्ठ तथा मोर्चाका तर्फबाट महन्थ ठाकुर, यादव र हृदयेश त्रिपाठी सहभागी थिए ।

सुशील कोईराला र महन्त ठाकुर बिच वार्ता हुँदै 

नेपाली कांग्रेसका सभापति सुशील कोइराला र तमलोपा अध्यक्ष महन्थ ठाकुरबीच अहिले भेटवार्ता भइरहेको छ ।  जारी राजनीतिक गतिरोध अन्त्यका लागि सहमतिको बिन्दु पहिल्याउने प्रयास स्वरुप महाराजगन्जस्थित कोइराला निवासमा दुई नेताबीच भर्खरै भेटवार्ता सुरु भएको छ ।सरकारले बोलाएको त्रिपक्षीय वार्तामा भने कांग्रेस नेताहरु अनुपस्थित हुनु र वार्ता विनानिष्कर्ष टुंगाएर तुरुन्त कांग्रेसका नेता संग वार्तामा बस्नुलाई अर्थपूर्ण रुपमा हेरिएको छ  ।नेपालसंदेशबाट

 

तपाईको प्रतिक्रिया