- दिलिप कुमार साह

राजविराज। जिल्ला संकट व्यवस्थापन समितिको बैठकले सप्तरीमा दुई महिनायता जारी गरिएको निषेधाज्ञा हटाएको छ । निषेधाज्ञा हटेसंगै अन्य धेरैजसो व्यवसाय र जिल्लाभित्र निजी सार्वजनिक सवारी साधन र सिटी रिक्सा सञ्चालन गर्न पाइने भएको छ । सोमबार बसेको जिल्ला संकट व्यवस्थापन समितिको बैठकले निषेधाज्ञाबाट आम जनजिविकामा परिरहेको असर समेतलाई दृष्टिगत गरी सुरक्षा सतर्कता अपनाउँदै व्यापार, व्यवसाय, उद्योग, कलकारखाना र सरकारी कार्यालय खोल्ने निर्णय गरेको जिल्ला प्रशासन कार्यालयका प्रशासकीय अधिकृत आनन्दकुमार ठाकुरले जानकारी दिनुभयो ।

यातायात मापदण्ड पालना गरी बढीमा २ जना यात्रु राखेर सिटी रिक्सा संचालन गर्न दिने निर्णय पनि भएको छ । त्यस्तै होटल रेष्टुरेन्टले टेक अवे सेवा मात्र दिन पाउनेछन् । खाद्यवस्तु, इन्धन, खाना पकाउने ग्यास, तरकारी, फलफुल, दुध, डेरी, हार्डवेयर, कपडा पसल लगायतका पसल संचालकले ग्राहकको तापक्रम नाप्ने, २ मिटरको भौतिक दूरी कायम गर्ने, मास्क सेनिटाइजरको प्रयोग गर्ने गरी व्यवसाय सञ्चालन गर्न पाउनेछन् । उद्योगहरुले सरकारले तोकेको वाणिज्य तथा आपूर्ति क्षेत्रले अपनाउनुपर्ने सुरक्षा, जनस्वास्थ्य र यातायात मापदण्डको पालना गर्नुपर्नेछ । बैंक तथा वित्तीय संस्थाले ५० प्रतिशत कर्मचारी आलोपालो गरी उपस्थित हुने गरी भिडभाड हुन नदिई सेवा सञ्चालन गर्नुपर्नेछ । पछिल्लो साता राजविराजमा मात्रै सीमित भएको निषेधाज्ञा सोमबारदेखि हटाइएको हो ।

तपाईको प्रतिक्रिया