१९ जेठ, रविन्द्र साह सप्तरी । समाज र देशको विकासका लागि शिक्षा र स्वास्थ्यलाई अगाडी बढाउनुपर्नेमा एक कार्यक्रममा सहभागिहरुले जोड दिएका छन । आमसंचार समिति युनेस्कोका निम्ति नेपाल राष्ट्रिय आयोगको सचिवालय शिक्षा मन्त्रालयको आयोजनामा मंगलबार राजविराजमा आयोजित शिक्षा र स्वास्थ्य क्षेत्रको विकासमा आमसंचारको भुमिका विषयक कार्यशाला गोष्ठिमा सहभागि बक्ताहरुले सो कुरामा जोड दिएका हुन ।
युनेस्कोका निम्ति नेपाल राष्ट्रिय आयोग मिडिया कमिटिका संयोजक एवं गोरखापत्र दैनिकका पूर्व प्रधान सम्पादक समेत रहनुभएका सीताराम अग्रहरिको अध्यक्षता तथा आयोगका सहायक महासचिव एवं पूर्व सिडियो डा. कमलेश्वर सिन्हाको प्रमुख आतिथ्यमा आयोजित सो गोष्ठीमा बरिष्ठ पत्रकार राजेश्वर नेपालीले शोषित पीडित जनताको आवाज उठाउन संचारकर्मीहरुले अहम भूमिका निर्वाह गर्नुपर्नेमा जोड दिनुभयो ।
संचारकर्मीहरुले इमान्दारिता पूवर्क समाजमा रहेका विभिन्न समस्याहरुलाई उजागर गर्न कलम चलाउनु पर्ने बताउँदै संचारकर्मीले निष्पक्ष ढंगले कसैको छायाँमा नरहेर पत्रकारिता गर्न सुझाव समेत दिनुभयो । सोही गोष्ठिमा बरिष्ठ पत्रकार शिवहरी प्रसाद भट्राई, कान्तिपुरका पत्रकार दिनेश यादवले शिक्षा र स्वास्थ्य क्षेत्रमा रहेका विधमान समस्यालाई पत्रकारहरुले अझ् उजागर गर्नु पर्नेमा जोड दिनुभयो । उक्त कार्यशाला गोष्ठिमा विगत लामो समयदेखी पत्रकारिता क्षेत्रमा क्रियाशिल रहनु भएका बरिष्ठ पत्रकार राजेश्वर नेपाली, अनिल कुमार अनल, शिवहरी भट्राई, वैजनाथ झा तथा मुरली प्रसाद यादवलाई दोसल्ला ओढाएर कदर पत्रसहित सम्मान गरिएको छ ।
पत्रकार नेपाली विगत ५५ वर्षदेखी, अनल विगत ४७ वर्षदेखी, भट्टराई ४० वर्षदेखी, झा विगत ३५ वर्षदेखी तथा यादव विगत २५ वर्षदेखी पत्रकारिता क्षेत्रमा क्रियाशिल रहनु भएको छ । सो गोष्ठीमा सहभागि संचारकर्मीहरुलाई समेत प्रमाण पत्र प्रदान गरिएको थियो । गोष्ठीमा सप्तरी, सिरहा र धनुषा जिल्लाका दुई दर्जन पत्रकारहरुको सहभागिता रहेको थियो ।
