भारतले दियो ४० वटा एम्बुलेन्स र ८ वटा बस उपहार

माघ १२/ काठमाडौंको लैनचौरस्थित भारतीय राजदूतावास परिसरमा एक सार्वजनिक समारोह आयोजना गरी भारतको ६७औं गणतन्त्र दिवस मनाइएको छ । उक्त अवसरमा भारतीय राजदूत रणजीत रायले राष्ट्रिय झण्डा फहराइ भारतका राष्ट्रपतिले राष्ट्रका नाममा दिएको सन्देश पढेर सुनाएका थिए । उक्त सन्देशमा अन्य कुराहरुको अतिरिक्त शान्ति, स्थायित्व र छिमेकको विकासलाई जोड दिइएको छ ।
नेपालको विकासको यात्रामा भारत सरकारको सहयोगको प्रतिवद्धता सहित भारत सरकारले नेपालका विभिन्न जिल्लाका अस्पतालहरु, नाफा कमाउने उद्देश्य नभएका परोपकारी संस्थाहरु तथा शैक्षिक संस्थाहरुलाई नेपालमा स्वास्थ्य तथा शैक्षिक सेवा अभिवृद्धि गर्न ४० वटा एम्बुलेन्स र ८ वटा बस उपहार स्वरुप प्रदान गरेको छ ।