इनरुवा। भोक्राहा नरसिंह गाउँपालिकाले जिल्ला अस्पताल सुनसरीसँगको सहकार्यमा अपाङ्गता भएका व्यक्तिहरूका लागि स्वास्थ्य जाँच १ दिने शिविरको आयोजना गरेको छ। कार्यक्रमको प्रमुख अतिथि गाउँपालिकाका अध्यक्ष अजमल आजाद रहेका थिए, जसले यस प्रकारका कार्यक्रमले समाजका अपाङ्गता भएका सदस्यहरूको स्वास्थ्य र जीवनस्तर सुधार्न महत्त्वपूर्ण भूमिका खेल्ने बताएका छन्।
गाउँपालिकाको उपाध्यक्ष श्रीमती सुनिता कुमारी उरावको अध्यक्षतामा सम्पन्न कार्यक्रममा अपाङ्गता भएका ५० भन्दा बढी व्यक्तिहरूलाई चेकजाँच, परामर्श र आवश्यक काड वितरण गरिएको थियो। शिविरमा हड्डी तथा नशा रोग बिशेषज्ञ डा. सुरज दाहाल, जेनरल फिजिसियन डा. रंजित सिंह मेहता र नाक कान घाँटी रोगको विशेषज्ञ डा. राजेस कुमार रायले विशेष सहजिकरण गरेका थिए।
उपाध्यक्ष उरावले अपाङ्गता भएका व्यक्तिहरूलाई स्वास्थ्य सेवामा पहुँच पुर्याउनु अति आवश्यक रहेको भन्दै, “हामीले आफ्नो गाउँपालिकामा रहेका अपाङ्गता भएका व्यक्तिहरूको स्वास्थ्य र तिनको पुनःस्थापनाका लागि यस्ता कार्यक्रमलाई निरन्तरता दिन्छौं,” भनिन्।
स्वास्थ्य शाखा प्रमुख हिरा लाल साहको नेतृत्वमा सम्पन्न कार्यक्रममा स्थानीय स्वास्थ्य सेवाको महत्त्वलाई समेत उजागर गरिएको छ।
शिविर सफल बनाउने उद्देश्यले गाउँपालिकाले स्वास्थ्य सेवाबारे जनचेतना फैलाउन र अपाङ्गता भएका व्यक्तिहरूको जीवनस्तर सुधार्न विभिन्न पहल गरिरहेको छ। अपाङ्गता रोकथाम र पुनःस्थापना कार्यक्रमको सिलसिलामा सरकारले पनि स्थानीय निकायलाई सहयोग गर्दै आएको छ, जसले गर्दा यो कार्यक्रम सफलतापूर्वक सम्पन्न भएको हो।
अन्तमा, यस प्रकारका कार्यक्रमहरूले अपाङ्गता भएका व्यक्तिहरूको जीवनमा सकारात्मक परिवर्तन ल्याउने आशा गरिएको छ। यो शिविर स्वास्थ्य सेवामा पहुँचको समानता र समावेशी विकासको लागि एउटा उदाहरणको रूपमा स्थापित भएको छ।
