काठमाण्डाै । भारी वर्षासँगै आउँदो साता देशैभरका नदीमा बाढी आउन सक्ने ‘ग्लोबल हाइड्रोलोजिकल मोडेल’ले भविष्यवाणी गरेको छ। कोसी, नारायणी, गण्डकी, कर्णाली,पश्चिम राप्ती, महाकाली, वागमतीलगायत सवै नदीमा बाढी आउन सक्ने ग्लोबल हाइड्रोलोजिकल मोडेलको प्रक्षेपण छ।
जल तथा माैसम विज्ञान विभागको बाढी भविष्यवाणी शाखाले गत वर्षको मनसुनदेखि नक्सालस्थित कार्यालयबाट २४ सै घण्टा देशका मुख्य मुख्य नदीमा आउन सक्ने बाढीको अनुगमन गर्दै सर्वसाधारणलाई सतर्क गराउँदै आएको छ।
आउँदो साताको भविष्यवाणीपछि विभागले सर्वसाधारणलाई बाढीको पूर्वसूचना दिन काम थालेको छ। ‘ग्लोबल हाइड्रोलोलिजकल मोडेलहरुले घनघोर वर्षापछि बाढीको आंकलन गरेकाले हामीले पूर्वसूचना प्रणालीलाई प्रभावकारी बनाएका छौं,’ शाखाका बाढी भविष्यवाणी विज्ञ विनोद पराजुलीले भने,‘सकेसम्म सर्वसाधारण सचेत होऊन् र धनजनको क्षति नहोस भन्ने हाम्रो उदेश्य हो।’
पराजुलीका अनुसार प्रमुख नदीहरुमा स्थापना गरिएका बाढी पूर्वानुमान केन्द्रहरुबाट रियल टाइम बेसिसका आधारमा प्राप्त हुने जलसतह र वर्षाको विवरणका आधारमा गरिने बाढी पूर्वानुमान सेवा विभागको वेवसाइटमा सेत हेर्न र थाहा पाउन सकिन्छ। अाजकाे कान्तिपुर दैनिकमा खबर छ ।
