गाँजा बोकेको ट्रक सहित ३ जना देवानगंजबाट पक्राउ

सुनसरीको देवानगंजबाट ४ सय ४० केजी गाँजा जिल्ला प्रहरी कार्यालय सुनसरीले बरामद गरेको छ। विशेष सुराकीको आधारमा मंगलबार राती देवानगंज गाउँपालिका वडा नं. ५ मेहता टोलबाट उक्त गाँजा सहित ३ जनालाई प्रहरीले नियन्त्रणमा लिएको हो।

इलाका प्रहरी कार्यालय साहेबगंजबाट खटिएको प्रहरी टोलीले को. १ ख. ७१२३ नम्बरको मिनि ट्रकलाई चेक जाँच गर्दा ट्रकको चालक बस्ने सिट पछाडी बन्द बाक्सा फल्स बटम भित्र १३ वटा बोरामा प्याक गरी राखिएको ४ सय ४० केजी गाँजा, भारतीय १ लाख ५० हजार रुपैया र नेपाली ५२ हजार रुपैया सहित उक्त नम्बरको मिनि ट्रक नियन्त्रणमा लिएको जिल्ला प्रहरी कार्यालय सुनसरीले जनाएको छ।

पक्राउ पर्नेमा मकवानपुर भिमफेदि १४ बस्ने २५ बर्षीय चन्द्र बहादुर पाख्रिन, मोरंग लेटाङ ६ बस्ने बल बहादुर लिम्बु र सुनसरी देवानगंज ४ बस्ने ३० बर्षीय अरबिन्द पाल रहेका छन् भने पक्राउ पर्ने चन्द्र बहादुर पाख्रिन मिनि ट्रकका चालक हुन्। घटनाको विषयमा थप अनुसन्धान भै रहेको जिल्ला प्रहरी कार्यालय सुनसरीले जनाएको छ।