चक्रघट्टि मधुवन सडक खण्डबाट फिल्मी शैलीमा गाँजा बरामद

सुनसरी प्रहरीले फिल्मी शैलीमा २४७ के. जी लागु औषध गाँजा बरामद गरेको छ। गए राती बराहक्षेत्र नगरपालीकाको राजाबास स्थित इलाका प्रहरी कार्यालय महेन्द्रनगर चक्रघट्टिबाट खटिएका प्रहरी टोलीले उक्त गाँजा बरामद गरेको हो।

चक्रघट्टि बाट मधुवन तर्फ जादै गरेको प्रदेश १-०१-००२ च. ३५७५ नं. को महिन्द्र बलेरोबाट उक्त परिमाणको गाँजा बरामद गरिएको हो। विशेष सूचनाको आधारमा गए राती उक्त बोलेरोलाई शंका लागी रोक्न खोज्दा नरोकी भागी फरार रहेको प्रहरीले जनाएको छ। तिव्र गतिमा रहेको उक्त बलेरो प्रहरीले पछयाउदै जादा १ राउण्ड गोली हवाई फायर पश्चात गाडी नियन्त्रणमा लिएको हो। उक्त गाडी चालक फरार रहेको जिल्ला प्रहरी कार्यालय सुनसरीले जनाएको छ।

प्रहरीले प्लाष्टिले बेरेको १२ पोका कुल २४७ के.जी गाँजा र महिन्द्र बलेरो नियन्त्रणमा लिन सफल भएको हो भने गाडी चालकलाई नियन्त्रणमा लिन असफल रहेको छ। चालकको खोजतलास लगायतको थप अनुसन्धान गर्ने कार्य भइरहेको जिल्ला प्रहरी कार्यालय सुनसरीले जनाएको छ।