नेता भण्डारीलाई देश बाहिर सुविधा सम्पन्न अस्पतालमा उपचार गर्न

काठमाडौँ । नेपाली कांग्रेसका नेता डा. चन्द्र भण्डारीको सघन उपचार कक्ष (आइसियु)मा उपचार भइरहेको छ । कीर्तिपुरस्थित कीर्तिपुर अस्पतालमा उनी र उनकी आमा हरिकला भण्डारीको आइसियुमा उपचार भइरहेको अस्पतालका मेडिकल डाइरेक्टर डा. निजिना ताम्राकारले जानकारी दिइन्। हिजो राति आफ्नै घर बुद्धनगरमा ग्यास सिलिण्डर पड्किएर उनीहरु घाइते भएका हुन् । अस्पतालको जलन उपचार विभागका प्रमुख डा. किरण नकर्मीका अनुसार सांसदसमेत रहेका नेता डा. भण्डारीको दुवै हात र दुवै गोडा गरी २५–३० प्रतिशत र आमा हरिकलाको जीउको अधिकांश भाग गरी ७० प्रतिशत जलेको छ । यस्तै, डा. भण्डारी र आमा हरिकला दुवै जनाको श्वासनलीमा तातो हावा र धुवांका कारण जलन भएको हुनसक्ने अत्यधिक सम्भावना रहेको डा. नकर्मीले जानकारी दिइन् । उनका अनुसार नेपालमा भएको साधन र स्रोतले उपचार सम्भव नभएकाले देश बाहिर सुविधा सम्पन्न अस्पतालमा उपचार गर्न स्थानान्तरण (सिफारिस) गरिएको छ ।