२७ चैत्र, रविन्द्र कुमार साह ।(फाइल फोटो) सिरहा पूर्वी र मध्य तराईका सिरहा, सप्तरी र धनुषामा हरुवा चरुवा अधिकारका लागि कार्यरत एक्टिभिष्टहरुको सुदूर पश्चिम नेपालको कञ्चनपुर पुगेको छ । सुदूरपश्चिम नेपालका जिल्लामा चलेको हलिया कमैया मुक्ति आन्दोलन र नेपाल सरकारले गरेको भनिएको पुनःस्थापनाको स्थलगत अवलोकन गर्न शनिबार कञ्चनपुरको महेन्द्रनगरमा पुगेको हो । नेपाल सरकारले २०५७ साल साउन २ गते कमैया मुक्ति तथा २०६५ भदौ २० गते हलिया मुक्तिको घोषणा गरेको भएपनि पूर्वी र मध्य तराईका ८ जिल्लामा हरुवा चरुवाहरु बँधुवा मजदूरकै रुपमा काम गर्न बाध्य छन् । तराईका ८ जिल्लामा करिब एक लाख घर परिवारहरु अहिले पनि बाँधा मजदूरका रुपमा काम गर्न बाध्य छन् । जसमध्ये करिब ९० प्रतिशतभन्दा बढी दलित समुदायका रहेका छन् । राष्ट्रिय मुक्त हलिया समाज महासंघले कंचनपुरमा सञ्चालन गरेको सहकारी, नेपाल सरकारको मुक्त हलिया पुनःस्थापना लगायतका क्षेत्रको स्थलगत अवलोकन गर्ने योजना रहको भ्रमण टोलीका सदस्य तथा सि.आर.डि.एस.नेपालका कार्यक्रम संयोजक मणिलाल विकले बताउनुभयो ।
