काठमाडौं, ९ कात्तिक दुर्घटनाको उच्च जोखिम भएकाले सार्वजनिक यातायातमा इन्धन बोक्न प्रहरीले कडाइ गर्न थालेको छ । भारतका सीमावर्ती सहरबाट ड्रम तथा जर्किनमा भरेर पेट्रोल तथा डिजेल नेपाल ल्याएर विभिन्न सहरमा पुर्याउन थालिएपछि प्रहरीले कडाइ गरेको हो । सार्वजनिक सवारीसाधनमा इन्धन ओसार्दा आगो लाग्ने सम्भावना धेरै हुने भएकाले प्रहरीले कडाइ गरेको हो । ठूलो मात्रामा पेट्रोल बोकेको यात्रुबाहक बस गत मंगलबार बाँकेमा दुर्घटना हुँदा आठजनाको मृत्यु भएको थियो । लु.१ख ५८२८ नम्बरको बस बाँकेको खासकुश्मा भन्ने स्थानमा पल्टिएपछि आगो लागेकाले धेरैको मृत्यु भएको थियो । दुर्घटनामा २१ जना घाइते भएका थिए । धेरैलाई दुर्घटनापछि लागेको आगोले पोलेको थियो । भारतले विगत पाँच सातादेखि गरेको नाकाबन्दीका कारण देशभरि इन्धन अभाव छ । सोही कारण भारतीय बजारका पेट्रोलपम्पबाट ड्रममा पेट्रोल भरेर नेपाल ल्याई महँगोमा बिक्री गरी कालोबजारी भइरहेको छ । सार्वजनिक यातायातबाट पनि त्यसरी पेट्रोल ओसार्ने गरिएको छ । तर, यसले जोखिम बढेकाले सार्वजनिक यातायातमा पेट्रोल ओसार्न र महँगोमा बिक्री गर्नेहरूलाई पक्राउ गर्न प्रहरी प्रधान कार्यालयले निर्देशन दिएको छ ।नयापत्रिकाबाट
